旅行後想減肥又冇乜時間嘅話🕑，近年大受歡迎嘅 H.I.I.T. 就啱哂日理萬機嘅你🤸🏻♀️，喺開始訓練之前，一齊嚟睇下做 H.I.I.T. 要留意嘅重點啦🔍！
H.I.I.T. 係高強度間歇訓練（High-Intensity Interval Training）嘅縮寫，喺近年越嚟越受歡迎。
因為佢比起傳統帶氧運動，可以喺更短時間內提升新陳代謝、運動表現同改善肌肉質量。
H.I.I.T.鍛煉包括短時間嘅高強度運動（通常為 20-90 秒），中間搭配休息時間，整個鍛煉過程可持續 10-30 分鐘。
如果方法得當，係可以有效咁達到鍛煉效果，慳到唔少時間。
問題係你做得啱唔啱？
2019 年，利物浦約翰摩爾斯大學嘅研究人員為咗比較兩種 H.I.I.T. 訓練方式，邀請咗 26 名平時久坐嘅男性及女性，進行為期 6 星期嘅體重鍛煉。
60 H.I.I.T.：6-10次 60秒運動/60秒休息
30 H.I.I.T.：4-8次 30秒運動/120秒休息
60 H.I.I.T. 組嘅帶氧能力提高咗 7%，但 30 H.I.I.T. 組冇明顯嘅差異。
咪住，喺你急不及待將所有 H.I.I.T. 鍛煉改為 60 秒運動及 60 秒休息嘅循環之前，我地一齊嚟睇下 30 H.I.I.T. 組冇提高帶氧能力嘅原因。
研究人員得出結論，30HIIT 組休息時間較長，受試者心率下降過多，導致有氧能力無法提高。
換句話說， H.I.I.T. 想有效就必須保持較高心率。
設定H.I.I.T.鍛煉方式嘅其中一種方法，就係睇運動同休息嘅比例。例如：
60 H.I.I.T. 組運動 60 秒，休息 60 秒，運動同休息嘅比例為 1:1。
30 H.I.I.T. 組運動 30 秒，休息 120 秒，運動同休息嘅比例為 1:4。
透過調整 H.I.I.T. 鍛煉中運動同休息嘅比例，維持較高嘅心率，就能達至有效改善心血管健康。
1:1 嘅比例已證實有效，比如 60 H.I.I.T. 組中嘅60/60，但你亦可以選擇30/30或45/45。
先用 1:1 嘅比例嘗試唔同嘅秒數，進階後就可以將運動同休息嘅比例提高到 2:1。
小貼士：如果你覺得 1:1 嘅比例對你嚟講好吃力，可以嘗試 1:2。
