如果你主要目標係想透過運動消耗更多卡路里，咁做帶氧運動會好過重量訓練。但係如果你係想減脂修身、塑造更強壯嘅身體嘅話，咁重量訓練（包括利用你自身嘅體重）會係唯一嘅方法。
前提係你要同時控制飲食，減少卡路里攝取量，達到熱量赤字，咁先能夠有效達到減脂效果。做 1 個鐘帶氧運動雖然可以消耗到600 卡路里，但係如果你唔控制飲食，可能幾分鐘內你就會食番哂落肚。
我哋都知道，重量訓練對於強健嘅體魄、修身嚟講有幾咁重要，所以如果你想喺重訓時消耗多啲卡路里，呢度有3 個幫你加速減脂嘅秘訣～
加速減脂嘅秘訣
鍛煉時一組做 15-30 下
研究表明，比起一組只做 1-14 下，15至30下有助你增加肌肉，燃燒更多卡路里。
複合性訓練
同淨係針對一組肌肉嘅孤立式訓練動作相比，同時鍛煉多組肌肉嘅動作能幫助你消耗更多能量，例如：深蹲。
深蹲可以同時鍛煉腿部同臀部，比只係鍛煉股四頭肌嘅雙腿伸屈消耗多近 35% 嘅熱量。
循環式訓練
以循環嘅方式進行訓練，即連續做 4-6 款動作，動作之間休息最多30 秒，會比起重覆做同樣嘅動作，每組之間休息 60-90 秒，消耗更多熱量。
喺配合適當飲食嘅情況下，重量訓練同帶氧運動兩者結合絕對係快速減肥嘅不二法門。如果想知道更多增肌減脂嘅方法，歡迎向 BC24 駐場教練查詢。
